Bondye ap opere nan yon dimansyon oubyen domen ki pa deyo oubyen ki depase tan.

Komansman ak lafen pa defini egzistans Bondye paske egzistans Bondye pa gen ni komansman ak ni fen.

Bondye egziste pa deyo komansman ak lafen. Egzistans Bondye pa depann sou komansman ak lafen. Sa vle di, egzistans Bondye depase domen komansman ak lafen.

Avan komansman tout bagay, Bondye te gen tan egziste deja. Pa-t’ janm gen yon le Bondye pa-t’ egziste. Komansman se yon reyalite ki planifye e ki reyalize pa Bondye. 

Lafen pa yon reyalite ki manifeste tet li endepandan de Bondye. Li pa yon koz ki enpoze-l’ sou Bondye.

Se Bondye ak gwo pouvwa-L’ ki kreye lafen yon fason pou-L’ mete fen nan yon seri bagay selon pwop volonte-L’ pou pwop glwa-L’.

Bondye se komansman ak lafen. Avan komansman se Li, apre lafen se Li. Egzistans Li domine sou tou 2.  Komansman ak lafen sanse nan 2 pla men Bondye.

Si n’ap panse selon konteks komansman ak lafen oubyen konsepsyon nou kom lom konsenan reyalite limite pa komansman ak lafen se paske Bondye kreye-n’ nan yon domen ki limite oubyen ki karakterize pa fenomen komansman ak lafen.

Bondye atrave omnisyans Li gen tan konnen:

Bagay ki nan domen responsabilite lom:
1) Tout sa ki mal ki ka rive si pa gen okenn aksyon ki pran pou anpeche yo rive.

2) Tout sa ki mal ki p’ap rive akoz gen entevansyon k’ap fet pou anpeche yo rive.

3) Li konnen tout sa ki bon ki gen pou rive si lom lan chache volonte-L’.

4) Li konnen tout sa ki bon ki ta sipoze fet, men ki p’ap fet akoz lom lan pa chache oubyen rejte volonte-L’.

5) Tout bon pwoje ke lom lan genyen k’ap reyisi ansanm ak sa k’ap echwe.

Bondye se yon Bondye ki fonksyone selon responsabilite. Chak pati dwe egzese pwop responsabilite pa yo. Bondye kreye lom lan menm pou-l’ pran responsabilite-l’ pou-l’ fe tout sa ke-L’ komande lom lan fe.

Non selman sa, lom lan gen responsabilite fondamantal anve pwop tet li ke Bondye enplante nan li. Kidonk, responsabilite sa yo telman evidan, lom lan pa bezwen Bondye oubyen yon moun pou ki di-l’ li dwe egzese responsabilite sa yo.

Devan Bondye, fok lom lan pran responsabilite-l’ pou-l’ fe tout sa-k’ tonbe anba domen responsabilite-l’ pou-l’ evite yon seri pwoblem. 

Tre enpotan: Se devwa lom lan pou-l’ toujou egzese vijilans li paske Satan ap evolye nan yon dimansyon ki konekte ak sa ke-l’ pa vle pou lom lan konnen. L’ap travay kont lom lan, men-l’ pa vle pou lom lan an mezi pou-l’ detekte aktivite-l’ yo.

Nan ka sa, li bon pou Kwayan kapab chache direksyon Bondye nan sa l’ap fe. Li bon pou Kwayan toujou rete konekte ak Bondye yon fason pou Bondye ouvri je-l’ sou yon seri reyalite spirityel k’ap evolye ke-l’ dwe konnen ke inyorans ak neglijans kapab anpeche-l’ konnen.

Menm jan ke dyab la bezwen moun pou-l’ enfliyanse oubyen manipile pou-l’ akonpli volonte-l’ se konsa Bondye bezwen moun k’ap pran responsabilite yo pou yo kanpe pou Li sitou a trave lapriye paske tout sa k’ap manifeste nan mond fizik la, yo komanse o nivo domen spirityel la ki domine domen fizik la.

Bagay ki depase kapasite lom lan:

1) Tout sa ki gen pou rive ki gen rapo ak volonte absoli Bondye. Fok sa yo fet kanmenm paske se bagay ke Bondye dekrete etenelman.

2) Tout sa L’ap koz yo rive yon fason pou volonte-L’ ka akonpli.

3) Tout sa ki p’ap rive oubyen tout sa Li p’ap kite rive. Nan ka sa, Satan gen dwa okestre yon seri konplo, men Bondye p’ap kite yo fet.

4) Tout sa l’ap pemet rive pou yon rezon lom p’ap ka konprann.

5) Tout sa-l’ p’ap pemet rive ke lom ap atann ki ta dwe rive. 

Li konnen tout bagay sa yo sou fom yon reyalite, malgre gen anpil ladan yo ki ka ni chanje oubyen evite si gen entevansyon ki fet. Bondye atrave omnisyans ak omniprezans Li gentan etabli tet Li sou tout dimansyon tan. Kidonk, pa gen anyen ki ka fet ki ka pran-L’ pa sipriz.

Pa gen anyen ki ka fet lwen prezans Li oubyen san ke prezans Bondye pa-t’ gen tan la. Depi avan moman ke yon ak komet, Bondye te gen tan la. Alo, se pa tout bagay ki rive oubyen ki pa rive ki odone pa Bondye. Bondye pa gen men-L’ nan tout sa k’ap fet nan mond peves sa-a.

Nou menm an tan ke lom, nou ka konsevwa yon seri bagay sitou ki gen rapo ak danje oubyen mal nan konteks posibilite, yon bagay ki ka fet paske pa gen okenn garanti ke sa-n’ panse oubyen kwe-a l’ap fet jan nou vle-l’ la.

Anpil fwa, le n’ap fe desizyon nou konn genyen plizye altenatif ki prezante devan-n’. Gen kek moman se 2 opsyon selman: swa nou rete obeyisan a Bondye oubyen nou rebele kont Li ki baze sou fe sa ke-n’ santi ki fe plis sans a nou menm nan monan.

Tout desizyon ke n’ap fe koresponn ak yon reyalite swa l’ap nan avantaj oubyen dezavantaj nou. Chak desizyon sa yo, Bondye konnen egzakteman ki rezilta n’ap jwenn. Li gen tan konnen sa ki ka rive-n’ atrave chwa ke n’ap fe.

Gen moman se konnen volonte-L’ pou-n’ swa fe oubyen genyen yon bagay, men jan nou gen plan genyen bagay sa oubyen fe-l’ la se pa konsa-L’ vle-L’.

Gen moman nan le nou bezwen fe yon bagay oubyen nan moman nou bezwen yon bagay, Bondye nan tout sajes Li pa gen plan pou-L’ ban nou-l’ nan menm moman sa.

Gen moman tou se pa volonte Bondye menm. Kom konesans nou limite, gen bagay nou p’ap janm ka we yo, fok nou aprann repliye sou sajes Bondye.

Limitasyon Satan

Menm Satan pa gen yon fem setitid ke tout sa-l’ planifye ap rive fet jan-l’ planifye-l’ paske-l’ pa ka fe anyen ki ka twonpe vijilans Bondye. Misye paka fe anyen san pemisyon Bondye.

Anplis, misye paka sonde Bondye pou-l’ konnen sa-k’ nan entansyon-L’. Kidonk, dyab la paka predi ak 100 pousan si Bondye ap fe yon entevansyon pou-L’ bloke plan-l’ oubyen si L’ap pemet li fet.

Men sel sa vre, depi Satan planifye yon konplo, li gen tout dezi, entansyon, ak kapasite pou-l’ ekzekite-l’. Depi-l’ jwenn yon twou vid akoz inyorans, endiferans, neglijans, ak rebelyon lom ki ba-l’ yon dwa legal, l’ap jwenn yon chans.

Men misye konnen gen yon jou k’ap vini, Bondye ap mete yon fen nan wayom li ak tout aktivite l’ap mennen sou te sa. Satan plis okouran de reyalite ke gen letan dife k’ap ret tann li pase lom k’ap swiv li.

—————– Note —————–

Pwoteksyon: Si Kretyen-an pa pran responsabilite-l’ chak jou pou-l’ egzese vijilans li nan domen chache pwoteksyon ak direksyon Bondye, enmi-an ka jwenn yon twou vid pou-l’ atake-l’. 

Ajan dyab ka menm atenn li atrave pyej ke yo tann pou li tankou kout poud ki se yon bagay ki pa ta sipoze fet.

Paske yon gran aspe nan konba spirityel Kretyen-an ap mennen kont Satan tonbe direkteman nan domen responsabilite ke Kretyen-an dwe egzese. 

Satan konnen ke-l’ pa gen kapasite pou-l’ angaje nan yon konba tet pou tet ak Bondye. Pwiske Bondye vle akonpli volonte-L’ atrave lavi lezom, sa ki enterese-l’ se devye lom lan yon fason pou-l’ detwi lavi-l’.

Ebyen, viktwa ke Bondye dezire pou lom lan pote sou Satan se pa yon viktwa Bondye pral batay anfave lom lan san lom lan pa pran responsabilite-l’ pou-l’ soumet lavi-l’ a Bondye.

Se yon viktwa ki baze sou prezans ak pwisans Bondye k’ap travay nan lavi lom lan an fonksyon obeyisans ak soumisyon-l’ a volonte Bondye k’ap ekipe lom lan pou-l’ defet Satan. Pa ka gen viktwa san yon desizyon ak yon aksyon.

Tout sakrifis ke Bondye fe anfave lom lan atrave gras Li p’ap ka gen okenn vale pou yon moun si moun sa pa pran responsabilite-l’.