Fo-m’ dako pou-m’ satisfe ak volonte Bondye. Sa vle di fo-m’ dako pou-m’ pa bezwen tout sa ke Bondye pa vle pou mwen.

Fo-m’ dako pou-m’ pa ni pouswiv, ni rejwi tout vye plezi, satisfaksyon, ak eksperyans peche ki pa nan volonte Bondye paske vre satisfaksyon-a se pa nan peche ke-l’ ye, men se rete anndan volonte Bondye. Fo-m’ dako pou-m’ mennen lavi-m’ selon limit ke Bondye enpoze sou lavi-m’.

Bondye fe sa, se paske-L’ pa vle pou-n’ pran plezi-n’, se pa paske-l’ pa vle pou-n’ satisfe dezi-n’, anplis se pa paske-L’ pa vle pou-n’ pase yon bon moman, men-L’ fe sa pou pwoteksyon nou.

Peche Pa-T’ Janm La Pou-L’ Te Satisfe-n’

Bondye nan pwop souvrennte-L’ kite peche ki se yon bagay ki kont sa-L’ ye ak volonte-L’ devni yon reyalite pou montre lom lan ke vre satisfaksyon-an se nan Li selman.

Peche se pa yon bagay ke-n’ dwe itilize pou-n’ fe-l’ travay an avantaj nou paske peche la selman pou-l’ kowonpi, twonpe, ak detwi. Peche se zam ke Satan itilize pou-l’ ranfose ajanda-l’ ki baze sou vole, touye, ak detwi.

Bondye vle pou lom lan pran plezi-l’, Li vle pou lom lan rejwi-l’, men se atrave konteks limitasyon ke-L’ enpoze sou lom lan konsenan ki sa lom lan ka fe, ki sa-l’ pa dwe fe, ak ki le-l’ ka fe-l’.

Depi lom lan franchi limit sa yo, li p’ap janm ka rejwi oubyen fe eksperyans ak vre satisfaksyon ki soti nan Bondye selman. Peche pa ka satisfe nanm ou nan degre ke Bondye ka satisfe-w’.

Peche jis kreye yon ilizyon oubyen yon fo vesyon de sa vre satisfaksyon-an ye. Sa-w’ tante fe-a p’ap janm ka satisfe ni dezi sa ou ap fe fas kare nan moman ak ni dezi ki pral vini.

Viv Selon Limit Bondye

Vre Satisfaksyon ak pwoteksyon lom lan se te viv selon limit ke Bondye te bay yo. Satifaksyon yo se satisfe ak kote Bondye te plase yo. Vre satisfaksyon yo se te viv selon komand ke Bondye te ba yo.

Men Satan pase, li prezante yon lot fom satisfaksyon swadizan ki egziste pa deyo limit Bondye te ba yo. Kidonk, si yo vle fe eksperyans ak satisfaksyon sa, se pou yo franchi limit Bondye te ba yo-a.

Men se yon manti. Yo pa-t’ jwenn Sa Satan te pwomet yo. Satisfaksyon Satan te pwomet yo nan sans y’ap sanble ak Bondye pa-t’ menm egziste.

Swafte Lom Lan Anve Peche

Depi moun lan gen yon bagay l’ap chache nan vi sa l’ap mennen-an, li p’ap janm rete toutotan li pa jwenn li. Menm le ke sa l’ap chache-a pa egziste. Se jis yon ilizyon.

Kou-l’ fin jwenn sa-l’ panse-l’ t’ap chache-a, gen yon bagay k’ap di “yon lot bagay, yon nouvo esperyans, plis plezi, sa poko janm sifi, chache yon lot bagay kounyeya. Satisfaksyon ke-l’ te reseve pou eksperyans sa gen tan pase.

Eksperyans peche satisfe jis pou-l’ fe-w’ reyalize fo-w’ kontinye ap enplike nan nenm vi sa. Li selman satisfe-w’ jis pou-l’ enpoze desepsyon sa nan ou pou-w’ kwe ke vre satisfaksyon se la-l’ ye.

Plezi peche jis satisfe lom pou-l’ avegle yo de vre satisfaksyon ki soti nan Bondye selman. Telman gen yon aspe deseptif nan plezi peche, li rann peche-a pa we okenn lot bagay ki ka satisfe-l’ ke sa l’ap fe-a pandan ke peche ap plonje yo nan yon kondisyon kote vin gen mwens satisfaksyon.

Peche ofri lom lan yon satisfaksyon ki fe yo reyalize ke yo bezwen kontinye pratike sa y’ap fe-a. Li satisfe jis pou-l’ fe yo reyalize ke yo pa bezwen vre satisfaksyon ki soti nan Bondye ke yo ka jwenn atrave reziste dezi lache.

Paske Satan atrave peche eseye imite vre satisfaksyon lom lan ta sipoze jwenn nan Bondye selman nan yon sans deseptif pou-l’ avegle lom lan. Le lom lan antotye nan peche konsa, pou yo menm vre satisfaksyon-an se la-l’ ye.

Lom lan vin santi yo byen nan viv nan peche. Konn gen kek moman refleksyon apre yon ti relachman dezi lache bay yo ki bay yo opotinite pou yo examine pwop tet yo, men apre yon tan kou dezi lache sa yo retounen, yo retounen nan menm sa yo te konn fe.

Paske yo jwenn yon bagay nan peche-a ki fe yon bagay pou yo.

Rete Kole Sou Bondye

Li difisil pou lom lan rete kole sou Bondye yon fason pou Bondye kenbe-l’ pou-l’ pa livre tet li nan yon bagay ke-l’ gen tan konvenk k’ap fe-l’ plezi.

Li difisil pou lom lan reyalize ke si Bondye pa vle-l’ fe yon bagay, fo-l’ depann sou sajes Bondye ki baze sou verite ke-L’ konnen-L’ p’ap nan entere lom si-l’ fe-l’.

Se sou sa lom lan dwe depann kom satisfaksyon-l’ olye de satisfaksyon pou yon moman ke peche sa ap ofri-l’.

Eske ou ap dako pou-w’ reziste tout tantasyon, movez enfliyans k’ap egzese sou ou k’ap sansibilize-w’ anve yon peche, k’ap fe-w’ santi fo-w’ eseye-l’ paske-l’ bon anpil.

Eske ou ap di tet ou ke Bondye komande-m’ pa fe-l’, m’ap satisfe nan sa-L’ di-m’ lan. M’ap rejwi nan verite ke se pa volonte-L’ pou-m’ fe-l’. Li pa jis di-m’ pa fe-l’, Li di-m’ pou-m’ kouri pou li.

Men moun ki antotye nan peche-a p’ap janm we-l’ konsa. Moun ke desepsyon plezi yon moman peche avegle-l’ nan yon degre kote-l’ santi bon jan-l’ p’ap janm dako ak volonte Bondye.

—–

Mantalite lom lan vin tounen yon obje enpemeyab ki kouvri panse-l’. Le-w’ ba-l’ verite-a, li pa ka rantre. Sa-l’ kwe-a kreye yon blokaj pou verite-a fe chemen-l’ nan lavi moun sa.

Gen yon bagay nan moun sa k’ap konbat oubyen repouse tout verite ki ale kont sa l’ap fe-a.

Avan-w’ di verite-a ou santi rezistans lan.