Gwo Dekalaj Ant Reyalite Lakwa Ak Vi Moun – Bi Santral Pwojè Liv Sa

Senye, le m’ap gade verite Pawol la, vi ke-W’ komande-n’ pou-n’ mennen, gen yon gwo kokennchenn dekalaj ant vi sa ak reyalite vi ke anpil moun ap mennen an fonksyon dezi lache ak presyon ansanm ak egzijans ke vi sa ap egzese sou yo.

Vi Kretyen sa, vi sen sa, oubyen vi transfome sa se yon vi ki prezante nan yon sans absoli. Pa gen okenn dout ladan-l’. Kidonk, Ou pa vle pou lom lan gen okenn dout konsenan reyalite ke yo ka mennen vi sa si yo chwazi fe-W’ konfyans.

Vese apre vese konfime yon fem garanti ak setitid ke lom lan ka mennen vi sa pa pwisans Bondye.

Tout sa ki enposib a lom posib a Bondye (Lik 18:27)

Le-m’ li nan Pawol la, m’ we ke-W’ te soufri anpil, vese san-W’, ak mouri pou libere lom lan de peche yo. M’ we ke se yon travay ki konple.

M’ we ke-W’ te voye Sent Espri-a pou-L’ aplike pwovizyon sakrifis Ou sou lakwa nan lavi sila yo ki kwe. Kidonk, lom lan pa bezwen anyen an plis ke sakrifis sa.

Sa vle di ke si-W’ te kite syel la pou-W’ vin sou te sa, desann Ou nan nivo kreyati-a, pran fom lom, viv tankou yon lom selon tout limitasyon lom lan predispoze a yo menm, Ou te sibi tout tantasyon, Ou te soufri, yo te imilye-W’, yo te krisifye-W’; ebyen, si malgre tout soufrans sa yo sa pa-t’ sifi, sakrifis Ou-a t’ap an ven. Se yon echek total li t’ap ye.

Sa t’ap yon demonstrasyon ke Ou menm ki te kom Bondye nan lache pa gen ase kapasite pou sove lom lan de yon maladi peche ke se Bondye selman ki ka geri-l’.

Sa t’ap yon evidans ke peche se yon pwoblem ki depase kapasite Bondye pou-L’ rezoud li.

M’ we ke Pawol la toujou ap ensiste konsenan vi sen ke-n’ dwe mennen, Pawol la toujou ap raple-n’ viktwa ki gen nan lanmo-W’ pandan ke gen anpil moun ki an kaptivite, ki anchene pandan ke yo non selman konn verite-a, men yo eseye pou yo kite vi sa plizye fwa, yo pa kapab.

Yo konn Pawol la, men chak fwa yo jwenn tet yo nan vre sitiyasyon pou yo mete-L’ an aplikasyon, yo fayi.

Se komsi reyalite Pawol la pa ka materyalize nan lavi anpil moun. Se komsi tou le n’ap preche konsenan pwisans ki gen nan kwa, san Jezi ki te vese, koman ke sakrifis sa rann li posib pou-n’ mennen vi Bondye vle pou nou mennen-an se pale mete la. Se yon bagay ki pa fe sans a reyalite pratik, chak jou ke lom lan ap eksperimante nan vi-l’.

M’ kwe ke Senye menm Ou menm si-W’ t’ap fe yon etalaj sou sa-W’ te akonpli atrave sakrifis sa, Ou t’ap fe tan-W’ ap ensiste koman lom lan libere, koman lom lan gen viktwa, koman lom lan ta sipoze ap viv selon viktwa sa, koman sa fe-W’ mal le-W’ ap gade ravaj enmi-an ap fe nan lavi lom lan pandan ke-W’ te bay tout Ou menm pou-W’ te non selman retire yo anba grif Satan, men pou-W’ te mete yo nan yon pozisyon pou Satan pa gen pouvwa sou yo.

Sa se youn nan objetif prensipal gran sakrifis sa. Senye, m’ konprann gen anpil moun ki lage ko yo totalman nan inyorans, endiferans, ak neglijans ki vin san defans an fas Satan.

Men gen yon posyon moun ki nan yon konba ak yon seri peche ke yo pa ka janm ka pote viktwa sou yo. Gen moman moun sa yo konn ap travese atrave atanta ke yo fe pou yo kite vi sa se tankou pwisans lanmo-W’ pa egziste telman ke se dezi peche sa k’ap domine yo.

Satan toujou ap defet yo ak tout verite-a ki se yon reprezantasyon de Ou menm nan panse yo.

Pafwa ou di moun egzese lafwa yo atrave resevwa viktwa yo, men gen yon bagay nan yo ki poko ka reponn ak reyalite viktwa sa.

Senye, sa k’ap pase konsa?

Reyalite vi sa tounen yon obstak ki anpeche reyalite nan Pawol la materyalize nan vi lom lan. Ou pa-t’ kreye pou se reyalite vi sa ki kapab manipile fasilman pa Satan pou ki ap kontwole lom lan.

Verite Ak Reyalite