Bondye, ou gen yon kontwòl siprèm sou tan (pase, prezan, ak fiti), sou spas (longè, lajè, ak wotè oubyen pwofondè), matyè (solid, likid, gaz), ak enèji ki nan tout sa ki egziste (tout fòs kosmik ki egziste nan inivè-a). 

Kote Ou syeje sou twòn lan se orijin tout bagay ki egziste. Tout bagay ap evolye selon fason ak lòd Ou te kreye yo pou yo te evolye. 

Tout sa ki egziste te kreye pa Ou menm pou yon bi byen detèmine. Se Ou menm ki nwayo yo tout atravè Kris pa pwisans Sent Espri-W’. Se Ou menm ki kenbe oubyen soutni tout eleman sa yo ki konstitiye inivè-a an jeneral. 

Kidonk, Ou kreye spas ki sanse parèt vid men ki pa vid an reyalite tankou yon dra a 4 dimansyon. Tout objè oubyen kreyati k’ap deplase, yo oblije franchi dra sa-a.

Yo oblije franchi spas sa-a ke-W’ te kreye yon fason pou pèmèt aktivite ak mouvman kapab fèt. Kidonk, gen yon enpak ki fèt sou domèn sa.

Si dra sa-a te rijid, moun pa t’ap ka fonksyone nan mond sa-a. Li t’ap vin tankou yon dlo ki fè glas. Tout bagay t’ap rete yon sèl plas. Si gen mouvman ak fonsyonman nan mond lan, se paske ou te kreye-l’ non sèlman konsa, men Ou pèmèt yo kapab fèt.

Tout sa k’ap fèt kit li an akò oubyen kont volonte-W’ sanse konekte ak pwisans kreyatif Ou k’ap vibre nan tout sa ki egziste.

Ebyen, Ou kontwole spas oubyen domèn kote lòm ap fonksyone kòm gran Kreyatè siprèm. Avan menm ke te gen anyen ki te egziste, domèn sa-a te sanse vid.

Ou ranpli kokennchenn spas sa-a ak prezans Ou ki se yon fondasyon pou pwisans Ou kapab manifeste oubyen etabli.

Se atravè prezans sa-a ou afime omniprezans Ou ki pèmèt pwisans kreyatif Ou ki enfini te kapab manifeste e pran plas li nan tout inivè-a atravè tout sa ki egziste. Ebyen, se Ou menm ki aranje oubyen striktire tout bagay ki pèmèt gen yon cosmos ki byen òdone. 

Tout eleman ki konstitiye domèn sa-a se Ou menm ki non sèlman kreye yo, men se Ou menm ki soutni yo ap gwo pwisans Ou. Ou gen kontwòl sou tout objè ak kreyati k’ap deplase nan domèn sa a tout moman. Ou gen yon otorite sou tout fòm vi ki egziste. 

Menm ata lè-a ki ta sanble parèt vid, ou gen kontwòl sou tout eleman ki konstitiye-l’ tankou oksijèn ak nitrojèn, kabòn, metàn, ak agon. Tout sa yo tonbe nan kategori gaz ki ranpli espas kote lòm ap viv la.

Se gaz sa yo ke lòm ak zannimo yo respire chak jou. Menm spas ki sanse parèt vid, pwisans kreyatif Ou an mosyon kontinyèlman nan mete lòd nan tout cosmos la.

Responsabilite

Ou se yon Bondye responsabilite ki vle di, kontwòl ak dominyon-W’ sou tout bagay pa elimine responsabilite pesonel ke lòm lan genyen pou-l’ egzèse pridans, prekosyon, ak vijilans nan tout sa l’ap fè.

Se sa ki vin kreye tout kalite pwoblèm nan mond sa-a. Paske neglijans, inyorans, endiferans, ak mechanste lòm lan ka lakòz anpil domaj sou tè sa-a. 

Pa egzanp, moun ka menm pèdi vi yo si moun k’ap kondi-a ap fè neglijans, li pa gen kalifijasyon pou-l’ kondi, oubyen li anba enfliyans dwòg oubyen alkòl, li ka koze anpil danje, menm touye moun.

Si gen neglijans ki fèt o nivo reparasyon yon machin, sa ka lakòz machin sa-a pèdi kontwòl. Se menm bagay la tou pou avyon, tren, ak tout objè transpotasyon.

Se menm reyalite-a tou nan domèn konstriksyon ak tout lòt domèn ki egziste. Si lòm lan pa fè sa pou-l’ fè, oubyen li pa egzèse byen responsabilite l’, li kapab mete lavi-l’ ak lavi lòt moun an risk.

Ou kreye mond sa-a yon fason kote bon desizyon lòm ap fè kapab egzèse yon enpak pozitif. Ebyen, se menm jan tou move desizyon ke y’ap fè kapab egzèse yon enpak negatif. 

Anplis, eta pèdisyon ke lòm lan vin ap viv ki brize kontwòl pèsonèl ke-W’ te dwe gen sou lavi-l’ atravè yon relasyon entim pou mete lòd ak sekirite nan lavi-l’ vin bay Satan yon gwo tou vid pou-l’ enfiltre oubyen entèfere nan sa ke lòm lan ap fè pou-l’ koze mechanste. 

Ou kreye kò fizik lòm lan ak tè sa-a ki fè pati inivè-a. Inivè-a vin devni yon pi gwo reprezantasyon kò fizik lòm lan. Ou te bay lòm lan dominyon sou tout bagay ke-W’ te kreye, menm dyab la te anba dominyon sa-a. 

Ebyen lòm rebele kont Ou atravè soumisyon-l’ a vwa Satan, li fòfèt dominyon sa-a. Satan vòlè-l’ paske se pa-t’ pou li ke dominyon-an te ye.

Dominyon sa ki gen anndan-l’ otorite ak pwisans, Bondye te bay li pou lòm te ka kenbe oubyen prezève lòd ak amoni ke L’ te plase nan mond sa-a atravè kreyasyon-an atravè obeyisans lòm a Bondye. 

Ebyen, dezobeyisans lom vin mete dyab la nan yon pozisyon non sèlman misye vin gen dominasyon sou lemond, men li vin gen mwayen pou-l’ enfliyanse oubyen pwovoke tout kalite mechanste ak katastwòf nan mond sa-a.

Lòm lan vin tèlman egare, dyab la itilize-l’ san-l’ pa menm reyalize sa-a. Li vin tounen yon zouti nan men yon antite ke Bondye te ba-l’ dominyon sou li. Yon antite ki ta sipoze ap trennen anba pye lòm.

Tout sa k’ap fèt swa Ou pwovoke-L’ pou-l’ rive, oubyen Ou kite-l’ rive. Anpil move bagay k’ap fèt se pa volonte-W’ ditou. Kidonk, se pa Ou pa menm ki okèstre yo, men pou yon rezon misterye lòm paka konprann, Ou kite yo pase. Se bagay sa-a anpil fwa k’ap toumante lespri anpil moun konsènan souvrennte-W’.

Malgre tout, yon sèl bagay ke nou ka repoze lafwa-n’ sou li se pwisans ak byen veyans Ou depase neglijans, inyorans, ak mechanste ki nan kè lòm. Pwisans Ou depase pwisans dyab la ak tout aktivite l’ap mennen o nivo enfliyanse lòm ak pwovoke yon seri katastwòf nan mond sa-a.

Byen ak Mal

Tout sa k’ap fèt nan mond sa-a kit li se byen ou mal gen kòm fondasyon gwo pouvwa kreyatif Ou ki soutni oubyen kenbe striti atomik ki konstitiye tout sa ki egziste.

Si se pa-t’ gwo pouvwa sa-a, tout bagay nèt t’ap jis pèdi balans yo, desentegre, epi eksploze. Tout sa k’ap fèt sanse konekte ak pwisans Ou.

Sa vle di pil imoralite, abominasyon, ak mechanste ki gen nan mond sa-a, yo tout ap prospere atravè pwisans kreyatif Ou ki pèmèt lòm lan kapab fonksyone jan Ou te kreye-l’ pou-l’ te viv selon volonte-W’.

Tout kapasite ke lòm lan ap itilize pou-l’ fè tenten, se atravè menm pwisans sa-a ou te donte yo ak kapasite sa yo. Souf lavi sa ki nan lòm ke y’ap itilize-l’ tou tan pou yo mennen kò al komèt tout sa ki mal se Ou menm ki soutni-l’.

Pwisans kreyatif Ou kenbe tout eleman ki konpoze inivè-a pou yon rezon byen detèmine, pou glwa-W’ kapab manifeste atravè-a kreyasyon-an antan ke Kreyatè siprèm inivè-a.

Se yon pwisans ki pa diskrimine ant moun ki gen entansyon fè byen ak mal si se pa-t’ sa anpil moun fyèl yo t’ap pete deja oubyen yo t’ap annik friz totalman pandan y’ap planifye al fè yon mal.

Se yon pwisans ki fleksib nan degre ke volonte lòm lan fleksib. Ou pa mete yon arèt nan pwisans sa-a nan sans pou-l’ bloke kò fizik ak panse lòm lan ak chak fwa-l’ pral pare aji sou entansyon mal ke-l’ gen nan tèt li. Men sèlman gen konsekans ki rezève pou sila yo ki chwazi fè mal.

Akoz lòm lan gen volonte, pwisans sa-a pa la pou-l’ anpeche oubyen bloke pou moun al fè mal, peche vin rantre nan mond sa-a, lòm lan anba enfliyans Satan ki se yon lòt antite ki konekte pa menm pwisans sa-a chwazi mal la pandan ke pwisans sa toujou aktif nan soutni kò fizik yo ak souf vi ki nan yo-a. 

Panse, emosyon, ak volonte ki se la mal la kòmanse avan ke-l’ materyalize, yo tout se kapasite ke-W’ te bay lòm lan.

Se youn nan rezon ki fè Ou rayi peche anpil paske peche se yon ak derespektan ak deviyasyon ki baze sou itilize kapasite oubyen abilite ke-W’ te mete nan lòm lan pou pwòp glwa-W’ yon fason ki dezonore-W’.

Kèlkeswa jan sa ye, sa demontre-m’ otorite siprèm ke-W’ genyen sou tout bagay ki egziste. Prezans Ou tout kote nan inivè-a afime ominiprezans Ou ki vin sèvi kòm yon fondasyon pou pwisans kreyatif Ou ki fè pati Omipotans Ou kapab etabli tout kote nan inivè.

Omnisyans Ou ki te fè-W’ gen tan konnen an tout detay fason inivè-a ta pral striktire vin etabli tout kote nan inivè-a depi avan menm Ou te kreye tout bagay.

Kontwòl Bondye Se Yon Chanèl

Souvrennte Bondye ak kontwòl total kapital ke-L’ genyen sou tout inivè-a, se yon chanèl atravè-l’ tout sa-k’ pral manifeste dwe pase pou yo devni yon reyalite kit li byen ou mal.

Tout sa k’ap fèt nan mond fizik sa pou-l’ manifeste, fòk li manifeste atravè tan. Bondye gen kontwòl sou tout aspè tan an tan ke Kreyatè siprèm ki kreye tan, ki domine sou tan. Nan ka sa, chak segond ki pase ki vin bay minit, èd tan, jou, semèn, ane, deseni, syèk, milenè, se paske Bondye pèmèt li pase. 

Fò-l’ manifeste kanmenm atravè yon eleman ke Bondye te kreye ki fè pati matyè ki gen ladan-l’ solid, likid, ak gaz. Fòk li manifeste atravè spas ki gen ladan-l’ longè, lajè, ak wotè oubyen pwofondè ki fè pati mond materyèl la.

Kidonk, Bondye gen tout kapasite nan men-L’ pou-L’ bloke tout sa-k’ pral fèt ki pa nan volonte-L’ si-L’ vle paske yo pral manifeste atravè yon bagay ki kreye pa Bondye.

Ou gen otorite sou tou mal ak entansyon malefik. Ou gen otorite sou tout mal depi nan sous li ki se Satan.

Ou gen otorite sou tout aspè atravè yo mal la ap evolye kòmanse sou aspè spirityèl, pase nan mantal, emosyonèl, volontè, rive sou fizik.

Kidonk, pa gen anyen mal ki ka manifeste san se pa atravè yon bagay ke-w’ te kreye pou-l’ pase. Ou gen kontwòl sou tout bagay.

Pwisans Pawòl La

But in these last days He has spoken to us by His Son, whom He appointed heir of all things, and through whom also He made the universe. The Son is the radiance of God’s glory and the exact representation of His being, sustaining all things by His powerful Word. After He had provided purification for sins, He sat down at the right hand of the Majesty in heaven (Hebrews 1:2-3).

In the beginning was the Word, and the Word was with God, and the Word was God. The same was in the beginning with God. All things were made by Bim; and without Him was not anything made that was made (John 1:1-3).

Tout bagay te kreye atravè Pawòl la ki se Jezi Kris. Pawòl la non sèlman se fondasyon tout sa ki egziste, men-l’ se nwayo egzistans tout kreyasyon-an.

Pawòl la se zouti ki te aktive, anime, ak relache pwisans kreyatif Bondye pandan kreyasyon-an. Pawòl la se chanèl atravè-L’ pwisans Bondye te manifeste lè-L’ t’ap kreye tout bagay. 

Kidonk, pawòl la vin gen yon otorite siprèm sou tout bagay kit li an soumisyon ak Pawòl la ou pa.

Pawòl la domine sou tout bagay. Pawòl la te egziste etenèlman avan menm tout bagay te egziste. Se atravè menm Pawòl sa Bondye soutni tout inivè-a ak egzistans tout sa ki egziste.

Sa vle di pa gen anyen k’ap fonksyone oubyen ki ka fonksyone endepandan de Pawòl la. Anplis, pa gen anyen ki ka fonksyone san se pa atravè yon domèn, kapasite, abilite, prensip, oubyen yon lwa ki te kreye pa Pawòl la menm lè sa k’ap fèt la pa an amoni ak Pawòl la ou pa. Paske mechanste se yon deviyasyon de sa ki te kreye atravè Pawòl la.

http://www.ministry-strategies.org/pwisans-pawol/