Pwoblèm ke lòm lan genyen gen sitiyasyon ke-l’ jwenn tèt li kote dezi lachè ap enpoze yon seri egzijans pou-l’ satisfè yo, jan-l’ santi-l’ konvenk li fò-l’ eseye konekte a yon bagay jis pou-l’ jwenn satisfaksyon sa ke dezi-l’ ap oryante-l’ anvè bagay sa yon fason pou-l’ ka soutni tèt li.

Fòk li fè yon desizyon ak yon aksyon ki an amoni ak dezi lachè sa yo. Fò-l’ eseye kreye yon depandans sou yon bagay menm lè ke-l’ konnen-l’ kont volonte Bondye. Sa l’ap fè-a vin tankou yon nesesite endispansab li bezwen pou-l’ viv.

Men reyalite li mal pou-l’ sezi se Bondye ka fè plis ke satisfaksyon tanporè sa ke-l’ kite k’ap rann li antrave vi spirityèl li.

Bondye ka jere dezi sa yo si-l’ fè Bondye konfyans kèlkeswa jan sa ye. Si-l’ chwazi pou-l’ depann sou fèm konviksyon Pawòl la ki nan espri-l’ kote prezans Sent Espri Bondye demere olye pou l’ap tande sa dezi lachè yo ap di-l’.

Kidonk, li pa yon obligasyon pou l’ap satisfè tèt li ak yon pratik peche ki kont volonte Bondye ki pral kreye plis yon dezi pou menm bagay la.

Menm si-l’ ta rive kwè ke Bondye gen kapasite oubyen pwisan ase pou ede-l’ travèse yon seri vye moman l’ap fè fas kare, men se toujou nan yon sans pasif.

Paske li pa ka janm ka rive sezi sa nan sans pou-l’ kite-l’ devni yon reyalite nan lavi-l’.

Sa-k’ pral fè vrè diferans lan se kwè-l’ nan yon degre pou-w’ kite sa-w’ kwè-a manifeste nan lavi-w’ atravè mete-l’ an aplikasyon.

Kwè-l’ nan yon degre kote-w’ deside pou-w’ aji sou li. Kwè-l’ nan sans pou-w’ kite-l’ gide-w’ atravè desizyon ou ap fè. Fò-w’ fè yon desizyon ak yon aksyon.

Si-w’ twouve-l’ pa fin twò fè sans pou-w’ egzèse yon kwayans konsa se paske gen yon lòt bagay ke-w’ fè plis konfyans.

Pratik peche sa ki matye ak dezi sa yo ke-w’ santi se nan li ke-w’ chwazi pou-w’ kwè. Se li ke-w’ chwazi pou mete an aplikasyon. Kidonk, se li menm ke ou ap manifeste.

Gen yon pwisans nan sa-w’ chwazi pou-w’ kwè konsènan lè-w’ jwenn tèt ou nan mitan yon tantasyon. Si-w’ gen tan kwè ke sèl fason ke-w’ ka travese moman tantasyon sa se jis fe sa-w’ tante fe-a, ou aktive yon pwisans k’ap pouse-w’ nan ak la.

Anplis, pa gen rezon la pou-w’ depann sou Bondye pandan ke-w’ gen tan gen solisyon pou sitiyasyon-an deja. Ou gen tan konnen egzakteman sa pou-w’ fe.

Men si-w’ kwe ke Bondye ka ede-w’ travese moman tantasyon sa san-w’ pa oblije soumet ou ave-l’ nan degre-w’ kanpe sou sa-w’ kwe-a, ou bay Bondye opotinite pou-L’ relache pwisans Li nan lavi-w’.

Se sa-w’ panse oubyen se sa ou chwazi kite panse-w’ demere sou li-a ki pwodwi fason ke-w’ santi-w’.

Selon sitiyasyon-k’ prezante-a, jan-w’ santi-w’ la tou se li menm tou ki konn pwodwi fason-w’ panse. Oubyen se li menm ki konn sevi kom yon konfimasyon konsenan sa w’ap panse-a.

Sa-w’ panse-a se li menm ki pwodwi sa-w’ chwazi pou kwe-a.

Sa-w’ chwazi pou kwe-a oubyen sa ou anbrase kom reyalite sitiyasyon ke-w’ ye-a se li menm ki enfliyanse fason ou dwe aji.

Fason-w’ chwazi pou-w’ aji-a se sa-w’ pral manifeste alafen. Se sa-w’ vin manifeste-a ki pral ranfose oubyen fotifye panse ak tandans sa yo ki te deja nan ou.

Repwograme Panse-W’

Panse-w’ programe pou w’ asepte defet kom yon altenatif oubyen kom yon solisyon pou sitiyasyon ou twouve tet ou.

Ou chwazi defet pou-w’ echape responsabilite ke Bondye enpoze sou ou pou depann sou pwisans Li yon fason pou-w’ ka reziste tantasyon.

Ou dwe repwograme panse-w’ pou-w’ asepte viktwa Kris la kom reyalite ki dwe gouvene. Viktwa sa dwe devni reyalite lavi-w’.