Petèt sa ou tande-a tèlman annwiye lespri-w’, ou vin gen yon rezantman ak fristrasyon k’ap debòde nan ou ki prèt pou menm pwovoke-w’ pou pa kontinye tande sa k’ap di la.

Oubyen, ou gen yon santiman mepri-k’ fè-w’ jis pa konsène paske ou pa bay pèsòn regle anyen pou ou. Sa se vi-w’, ou mennen-l’ jan-w’ vle.

Selon pwòp konsepsyon-w’, ou wè se yon tan ou ap pèdi. Oubyen, ou pa gen tan pou pèdi pou ap tande yon mesaj ke-w’ te gen tan pa-t’ vle tande.

M’ rete konfidan ke genyen anpil nan nou ki gen tan kite paj sa-a oubyen ki gen tan prè pou fèmen paj sa-a paske sa m’ap di nou-an pa an amoni ak sa fòs k’ap enfliyanse lavi-n’ lan ta vle pou-n’ tande.

Pa kite espri rebèl sa k’ap aji nan nou rann ke-n’ pa vle tande Pawòl Bondye-a.

Ou ap mande, kòman m’ fè konn sa-a? M’ te konn santi-m’ menm jan avèk nou a yon pwen nan vi-m’ avan-m’ te remèt tout vi-m’ a Kris. Menm santiman rebèl, kouri pou Bondye, pa vle fè fas kare ak verite Pawòl la. Se sa-k’ te konn ap enfliyanse-m’.

M’ te konn ap mennen yon vi rebèl ki te ranpli-m’ ak tout vye santiman kont verite Pawòl la. M’ te yon moun ki te konn ap kouri oubyen nan mawon atravè tandans mwen nan sans pou-m’ pa fè fas kare ak responsabilite pou-m’ soumèt lavi-m’ a Bondye.

Tande, a chak fwa ou jwenn tèt ou nan yon sitiyasyon kote panse-w’ tèlman okipe ak sa-w’ gen entansyon fè selon vi ki kont volonte Bondye w’ap mennen-an ki vin rann ke ou pa gen okenn dezi pou soumèt lavi-w’ a Bondye, se kouri ou ap kouri pou Bondye.

Men youn nan bagay ke-m’ aprann sa-w’ kite k’ap gouvène lavi-w’ ki rann ke-w’ paka tande Pawòl la p’ap janm ka ba ou satisfaksyon ou ap chache-a.

Genyen yon deklarasyon-k’ di, angaje nan yon ak peche pou satisfè tèt ou yon sèl fwa twòp. Fè-l’ mil fwa pa janm ase. Ou p’ap janm ka satisfè vre paske ou paka satisfè tèt ou oubyen fè tèt ou plèzi ak yon bagay ke Bondye pa-t’ kreye-w’ pou-w’ te satisfè tèt ou ak li.

Menm si ou te bay tèt ou yon dèle pou ou repanti, ou p’ap respekte dèle-a vre. Pa egzanp, ann di ou di tèt ou: apre mwa sa, m’ap repanti.

Pwiske m’ gen tan devan-m’ toujou, m’ap fè si ke-m’ rejwi otan plèzi ke-m’ kapab. Nan ti tan sa, m’ap fè tout sa-m’ bezwen fè pou-m’ pa regrèt anyen.

Aprè tan fin pase, ou panse-w’ pral kapab fè yon desizyon konsa? M’ pa kwè paske vye tandans oubyen mantalite sa ap toujou enfliyanse-w’ pou ou kontinye ap fè menm bagay la.

Tande byen, ou gen yon eksperyans ke-w’ vle refè oubyen yon eksperyans ke-w’ vle fè daprè ou menm ke-w’ poko fè, men ki p’ap janm ka satisfè-w’ vre jan-w’ panse-a.

Genyen anpil nan nou k’ap tande-m’ la, ou jis gen yon bagay ou ap chache, ou pa konn egzakteman sa-l’ ye-a, oubyen bagay ki kont volonte Bondye ke-w’ vle akonpli atravè vi sa ou ap mennen-an vin tounen yon fòs dominant k’ap oryante lavi-w’ nan yon direksyon lwen Bondye.

Vrè satisfaksyon, konfidans, ak sekirite ou p’ap jwenn li atravè vi peche ou ap mennen-an. Ou p’ap jwenn li nan sèks, dwòg, alkòl, banbòch, ak tout lòt plèzi ke mond sa ofri. Paske tou vid ki nan ou se sèl Jezi ki ka ranpli-l’.

Plèzi tanporè oubyen plèzi pou yo moman paka ranpli yon twou vid ki nan ou ki ka ranpli pa yon “Etre” ki enfini. Plèzi lachè pa lòt bagay ke kreye plis dezi pou ou kontinye ap fè menm bagay la.

Kò sa ke ou ap nouri-l’ ak plèzi lachè, l’ap jis adapte-l’ ak plèzi ou ap nouri-l’ yo. Aprè yon tan, l’ap devlope yon tolerans ak plèzi sa yo ou ap rejwi. Kidonk, sa pral egzije-w’ pou rantre pi fon nan vi peche sa-a ou ap mennen-an.

Vi sa vin kreye yon rebelyon, animosite, ak endiferans nan ou anvè Bondye. Vi sa vin sèvi-w’ kòm yon obstak ki fè-w’ pa menm bay valè enpòtans sèvi Bondye.

Se vre jan ou ap mennen lavi-w’ ka fè-w’ santi ke-w’ pa bezwen Bondye. Oubyen, pou moman swiv Jezi pa gen priyorite. Ou bezwen Jezi kounyeya menm. Vrè esans lavi-w’ kòm moun ki kreye nan imaj Bondye baze sou yon relasyon ak Kris.

Reyalite konsènan sa-k’ kenbe-w’ pou pa remèt vi-w’ a Kris se toujou yon bagay ki pa enpòtan pase sa konpare ak enpòtans nanm ou. Se yon bagay ki pa gen okenn valè etènèl, men ki gen kapasite pou-l’ detwi nanm ou.

Pa jis fèmen paj la, pa chanje frekans lan paske sa m’ pral di-w’ pa fè-w’ plezi. Bay Bondye yon chans pou-L’ pale nan lavi-w’.

Se pa fristre nan panse-w’ jis nan degre ou santi-w’ pret pou pa tande sa m’ap di la. Ou santi-w’ pa ka sipote sa m’ap di-a jis nan pwen swa ou vle chanje chanel la, femen paj la, oubyen chanje frekans radyo-a.

Se pa sa ki solisyon pou pwoblem peche sa. M’ konprann egzakteman jan-w’ santi-w’.

Depi vi-w’ pa dwa, Bondye gen yon sel bagay l’ap mande-w’ pou-w’ ki se sispann viv nan rebelyon. Soumet lavi-w’ a Kris.

Piblikasyon ki sanble: