Pou brize yon vye vis, li bon pou-w’ pran tan-w’ ap etidye vis sa. Ki sa-w’ jwenn ladan-l’ konsa. Kòman-w’ santi presyon k’ap egzèse sou ou-a avan-w’ fè-l’ lè tantasyon vini, kòman sa ye diran eksperyans lan, ak kòman-w’ santi-w’ aprè.

Anpil fwa, desepsyon ki gen nan peche, ou konn eskite pou yon eksperyans, ou gen yon kiryozite, ou pa ka tann kilè pou moman rive, epi sa-w’ pral jwenn lan swa-l’ p’ap satisfè-w’ atant ou, swa pral rive yon pwen ou fatige paske foli-a jis pase.

Lè-w’ tante ap toujou gen yon bagay k’ap monte nan panse-w’ pou ki konvenk ou livre tèt ou. Bagay sa ap ba-w’ yon rezon menm pou-w’ fè-l’.

Movèz enfliyans sa ap pouse-w’ menm pou travèse limit ke-w’ konnen ke-w’ pa dwe travèse.

1. Ou soti nan yon etap avan tantasyon. Anpil fwa, se pa-t‘ oubyen se potko entansyon-w’ pou-w’ te fe-l’.
2. Ou sanse vin jwen tet ou anndan yon tantasyon k’ap egzese gwo presyon sou ou.
3. Ebyen pou-w’ al fe sa-w’ tante fe-a, fo-w’ kite etap tantasyon-an pou-w’ travese etap kote pou-w’ fe yon desizyon kont volonte Bondye.
4. Fo-w’ livre tet ou nan ak la.
5. Ou pral fe fas kare ak reyalite wont, kipabilite, ak malez apre-m’ fin fe-l’.

1) Avan peche

Tansyon, presyon, kiryozite, eksitasyon, chalè, enpasyans, pa ka tann moman, kreye yon fason pou-w’ angaje nan ak la, fikse panse-w’ sou ak la, pa kite panse-w’ fokis sou sa ke Pawòl Bondye-a di.

Pa kite anyen vin sèvi-w’ kòm yon obstak.

Franchi limit oubyen moman repantans pou-w’ al fè sa-k’ te gen tan pwograme nan panse-w’.

2) Atravè eksperyans peche

Rejwisans plèzi, retwouve tèt ou nan ak la, pa ka panse byen, bliye tèt ou, bliye si konsekans te menm egziste, sa k’ap vini aprè pa konsène-w’ paske se jis moman, pa bay Pawòl Bondye-a okenn valè, fè tout tenten pou-w’ byen rejwi moman-an, itilize tout strateji pou-w’ maksimize plèzi moman.

3) Aprè ak peche-a

Fason-w’ santi-w’ ka varye selon kondisyon lavi spirityèl ou. Si se yon peche konsyans ou vin souye nan yon degre ke-w’ santi-w’ konfòtab ladan-l’, gen yon dezi pou-w’ retounen touswit k’ap manifeste.

Regrèt ou ka santi se si gen yon bagay mal ki rive-w’ ki pral afekte tout rès lavi-w’.

Men si se yon peche ke konsyans ou di-w’ li pa bon, ou toujou ap pratike-l’, chak fwa-w’ sòti, ou retounen ladan-l’, ou ap santi-w’ vid, anpil fwa remò, anbarasman, wonte, pèdi respè-w’, pèdi yon bagay ke-w’ p’ap janm jwenn li ankò, anpil fwa se moman ou vin gen kapasite pou-w’ rantre nan ou menm pou-w’ panse ak danje ke-w’ te ekspoze tèt ou paske gen yon relachman ki  fèt.

Reyalite ke-w’ ka eksperimante se yon dezi pou-w’ kite touswit aprè-w’ fin fè eksperyans lan, sitou nan moman ke-w’ santi-w’ a vid la.

Men aprè yon ti tan, gen yon lòt dezi ki pral manifeste pou-l’ kontrekare dezi sa-w’ santi pou mete yon fen nan vi sa. Anpil fwa, dezi pou-w’ kontinye-a ranvèse dezi pou-w’ kite-a.

Kidonk, gen yon fòs demonyak k’ap sansibilize lòm lan anvè peche-l’ pandan ke menm fòs sa kreye yon santiman rebèl, mepri, ak inyorans anvè Pawòl la.

Se pil vye panse sa yo k’ap degaje nan lòm lan k’ap sansibilize yo anve tout vye entansyon ki ankane atrave panse sa yo.

Li vin difisil anpil pou moun sa detache panse-l’ de sa l’ap kontanple pou-l’ al fe-a.

(Sansasyon APRE Yon Eksperyans Peche)

Aprè eksperyans lan, m’ santi-m’ vid. Se nan menm moman sa, m’ konn santi yon dezi fè yon desizyon repanti.

Sansasyon a vid la fè-m’ santi pa gen anyen serye vre m’ap regle nan pratik peche sa. Nan moman, tout lòt entansyon prèske pa gen twòp enfliyans sou mwen paske pa gen yon dezi pou ki bay yo jarèt.

Se kòmsi tout bagay vin san valè. M’ vin pèdi enterè-m’ nan yon seri imaj eksperyans ki nan panse-m’ ke-m’ te konn ap aji selon yo menm.

Se rezon sa menm, m’ konn santi yon dezi pou-m’ jis fè yon desizyon kite. Men fason-m’ santi-m’ nan moman sa p’ap rete konsa toutan, li gen pou-l’ chanje.

Pwoblèm lan kounyeya se rete sou desizyon pou-m’ repanti-a paske dezi pou-m’ kite an fonksyon sansasyon a vid ke-m’ te santi-a sa gen pou-l’ defye pa yon lòt entansyon pou-m’ retounen nan menm peche-a ankò.

Kidonk, yon moman aprè gen yon lòt dezi ki pral manifeste ki gen pou-l’ wè ak fason-m’ ke-m’ pral santi-m’ ki gen pou-l’ pran kontwòl sansasyon vid sa.

Kou sansasyon a vid la fin pase, gen yon lòt dezi ki pral vini pou-m’ retounen ladan-l’ ankò.

Gen desizyon ekstrèm pou-m’ dezasosiye-m’ ak vi sa ke-m’ pa vle fè paske gen yon pòt ke-m’ kite ouvri pou-m’ retounen.

Apwòch Radikal Kont Sansibilite Anvè Peche

Lè lòm lan anba yon tantasyon k’ap egzèse anpil presyon sou li, sa vin kreye yon sansibilite ki trè entans, trè frajil anvè peche sa ki vin rann li plis difisil pou-l’ reziste. 

Pati imateryèl nan moun sa tankou nanm li gen tan plake nan ak la, se kò-a ki rete sèlman pou-l’ angaje nan ak la.

Pwiske nanm lan gen tan atache nan ak la, li vin mal pou-l’ reziste. Se tankou, moun lan vin san fòs pou-l’ fè fas kare ak tantasyon sa.

Entansyon oubyen imajinasyon ke tantasyon-an enplante nan tèt moun sa kole nan panse-l’ nan yon degre moun sa pa ka konsantre menm sou lòt bagay ke sa panse-l’ antòtye a li menm lan.

Li vin difisil anpil pou-l’ pran yon fèm desizyon ak aksyon kont sediksyon peche sa. Pran yon fèm desizyon se tankou frape tèt li ak yon objè nan yon pwen nan li ki trè sansib.

Depi fòs sa anvlope lòm lan, li kòm mal pou-l’ retire tèt li anba anvlòp sa. Li mal pou-l’ franchi, chire anvlòp peche sa ki anvlope-l’.

Solisyon

Nan ka sa, depi-w’ ta pran otorite sou tantasyon sa nan non Jezi, ou kanpe fèm sou Pawòl la, ou konfronte-l’ tèt pou tèt, ou p’ap tonbe.

Pwoblèm lan gen dwa se ou menm ki p’ap gen kouraj ase pou-w’ fè sa paske tantasyon sa-l’ fè se wonje li wonje rezistans ou.

Men sa ke Bondye onore se yon fèm desizyon ke-w’ pran pou-w’ jwenn satisfaksyon-w’ nan Li menm sèlman atravè koupe tout relasyon-w’ ak depandans ou sou peche sa ke-w’ konsidere kòm yon sous satisfaksyon ak sipò.

Retounen Nan Peche Ak Rebelyon

Anpil fwa, sa-k’ motive-m’ kòm koz santral ki pouse-m’ pou-m’ angaje oubyen retounen nan peche sa, se pa li menm m’al fè.

M’ te mèt t’ap konsantre-m’ oubyen medite sou yon verite Biblik, kou tantansyon-an vini kote yon imaj yon eksperyans monte nan panse-m’, depi-m’ kòmanse bay sa-m’ tante fè-a yon nivo konsiderasyon, m’ kòmanse vire do bay verite sa ki te ka kenbe-m’ pou-m’ pa tonbe nan ak la.

Menm moman m’ devni yon ènmi verite sa. Li vin pi fasil pou-m’ aji sou panse oubyen entansyon ki enplante nan lespri-m’ pase-m’ pou-m’ kanpe sou Pawòl la.

M’ plis gen tandans pou-m’ kite imaj sa k’ap evolye sou fòm panse vin materyalize atravè desizyon ke-m’ fè pou-m’ livre tèt mwen pase pou-m’ kite Pawòl la kenbe-m’ pou-m’ pa tonbe.

Kite Peche

Gen yon travay ki dwe fèt nan fason-w’ panse ak movèz kwayans oubyen konsepsyon ki vin devlope nan lòm lan ki rann peche ap pote yo ale konsa. Lòm lan vin pa ka panse byen menm.

Se plan Satan menm pou-l’ kenbe lòm lan nan yon dimansyon desepsyon yon fason pou-l’ rann lòm lan vin san defans kont movèz enfliyans ke l’ap egzèse sou lavi yo.

Peche evolye atravè desepsyon. Orijin peche sòti nan Satan ki se yon mantè depi nan kòmansman. Lavi demere atravè verite Pawòl la. Nan ka sa, dyab la itilize desepsyon kòm yon mwayen pou-l’ twonpe lèzòm yon fason pou-l’ dekonekte lòm lan a Pawòl la.

Desepsyon dyab la sanse yon deviyasyon de sa ke Pawòl la di. Atravè desepsyon, Satan ranplase verite-a ak yon manti yon fason pou lòm lan ka rejte verite-a.

Souvan, desepsyon-an konn tèlman parèt bèl nan je lòm lan, verite-a devni yon bagay ke lòm lan pa ka sipòte-l’. Fòk li franchi-l’ kanmenm pou-l’ al fè eksperyans ak reyalite ki kache dèyè verite sa.

Paske sèl sa ki kanpe sou chemen-l’ se verite Biblik ke-l’ konnen-an. Kidonk, fòk li eseye debarase tèt li, konsyans li de verite sa.

Solisyon-an se atake pwoblèm peche-an dirèkteman nan orijin li ki baze sou desepsyon. Peche se yon manti ke Satan ap enfliyanse-w’ pou-w’ asepte-l’ kòm yon verite ki dwe devni reyalite lavi-w’.

Ebyen, tantasyon sa ki enpoze-l’ sou ou nan yon degre ki fè-w’ santi sèl fason pou-w’ jere oubyen travèse moman sa se fè pou-w’ fè-l’, se yon manti.

Tantasyon sa ki fè-w’ santi pa gen yon fason ke-w’ ka echape-l’ oubyen sòti anba-l’ si se pa aji pou-w’ aji sou li, se yon manti.

Peche sa-k’ parèt tankou yon bagay ke-w’ santi-w’ pa ka viv san li, vi-w’ p’ap fè sans oubyen nòmal san-w’ pa fè-l’, se yon manti ke-l’ ye.

Paske si Bondye te wè-l’ konsa, Li pa t’ap janm entèdi pou-w’ fè-l’.

Peche ki se yon deviyasyon fason Bondye te kreye lòm lan pou-l’ viv vin kreye yon tandans kote lòm lan plis pran plèzi-l’ nan fè sa ki deyò volonte Bondye paske se la ke-l’ ka jwenn yon satisfaksyon ki an amoni ak sa kè-l’ ki kowonpi pa peche dezire.

Lòm lan santi-l’ pi byen nan viv nan peche. Livre tèt li nan peche plis fè sans pase obeyi Bondye. Kidonk, devan sediksyon peche, chwazi fè volonte Bondye parèt kòm yon opsyon ki inaseptab ak enpratikab nan je lòm lan.

Fason-l’ panse vin kenbe-l’ an esklavaj nan yon vi ki kont objektif egzistans li kòm moun ki kreye nan imaj Bondye. Se sa-k’ kreye pil konfizyon, egareman, ak anvoutman sa yo nan lavi lòm.

Amwenske gen yon chanjman total ki fèt nan panse lòm lan, peche ap toujou gen dominyon sou li.

1) Fòk li kwè Bondye pa-t’ kreye-l’ pou vi-l’ te depann sou peche.

2) Satisfaksyon-l’ se nan Bondye-l’ sèl li sòti atravè yon vi obeyisans.

3) Jezi Kris kòm Bondye atravè-L’ Bondye Papa te kreye tout bagay menm lòm lan te mouri pou lòm lan te ka gen viktwa sou peche k’ap evolye nan twa domèn sa yo: Satan, lemond, ak lachè.

4) Li pa yon obligasyon pou l’ap livre tèt li nan peche.

5) Pwiske Bondye rayi peche, se tout dezi-L’ pou-L’ ede lòm lan reziste yon bagay ke-L’ pa vle yo pratike.

6) Plèzi peche se pou yon moman. Satisfaksyon tanporè peche bay la se jis pou-l’ fè lòm lan reyalize ke-l’ bezwen plis toujou.

7) Desepsyon sa ki enpoze-l’ sou ou kòm yon reyalite ke-w’ pa ka echape-l’, ou ka echape-l’ pa pwisans Bondye.

Pwoblem lan se enkapasite pou lòm lan sezi, anbrase, ak depann sou reyalite ke yo pa bezwen sa ke yo adikte a li-a pou yo viv vre.

Lòm lan atravè depandans ke-l’ devlope atravè adiksyon sa poko ka wè li menm k’ap mennen yon vi endepandan de sa ke-l’ adikte avè-l’ la.

Souvan, lòm lan ka gen yon ide de reyalite sa nan panse-l’, men-l’ poko ka sezi-l’ nan degre pou-l’ kite reyalite sa devni reyalite lavi-l’.

Gade Pi Lwen Ke Dimansyon Plezi Ak Satisfaksyon Pou Moman

Adiksyon oubyen peche sa gen yon domèn l’ap evolye nan lavi-w’. Kidonk, se atravè domen inyorans, avègleman, ak egareman ke-l’ domine lavi-w’.

Lè-w’ gade adiksyon sa, gade-l’ nan yon pèspektif ki depase dimansyon adiksyon sa ap domine lavi-w’ ki baze sou aji sou dezi sa.

Fò pèspektif ou kapab depase domèn plèzi ak satisfaksyon pou yon moman yon fason pou-w’ depann sou pwisans Bondye.

Kòman pou lòm lan kapab viv selon reyalite sa?

Toutotan ke lòm lan nan twou peche-l’, gen reyalite-l’ p’ap ka janm pèsevwa-l’. Reyalite peche ke moun lan ap viv la gentan deside fason moun sa dwe viv.

Reyalite sa gen tan konvenk moun sa ke-l’ pa ka viv san peche sa.

Li mande pou lòm lan kapab rantre nan pwofondè li menk pou-l’ sonde tèt li.

Se aprann pou-w’ panse yon fason ki diferan ak fason sediksyon peche enfliyanse-w’ pou-w’ panse.

Tout Bagay Baze Sou Sa-w’ Kwè Ak Sa-w’ Pa Kwè

Viktwa Kris ranpòte sou lakwa disponib atravè Pawòl la. Se pa yon viktwa ki inaktif li ye. Se yon viktwa ki an mosyon oubyen k’ap ajite kontinyèlman atravè verite Pawòl la pa pwisans Sent Espri Bondye.

Se ou menm pou ki konekte lavi-w’ ak vitwa sa-a ki disponib atravè gras Bondye pa mwayen lafwa-w’.

Kidonk, libète Bondye vle bay lòm sou peche egziste deja sou yon fòm spirityèl. Pou-l’ materyalize nan lavi lòm lan, fòk lòm lan obeyi a sa ke Pawòl la di.

Libète anba peche baze sou kwè nan Jezi ak kite libète oubyen viktwa sa ke-L’ te vèse san-L’ pou-L’ te ba ou-a manifeste nan lavi-w’ atravè obeyisans ou a Pawòl la.

1. Se kwè
2. Egzèse sa-w’ kwè-a atravè obeyisans

Men kenbe tèt ou nan esklavaj nan peche baze sou kwè nan desepsyon Satan ap bonbade panse-w’ atravè sistèm mond sa ansanm ak mennen vi-w’ selon manti sa yo.

Pil vye kwayans ak mantalite k’ap domine panse lòm lan vin sèvi kòm yon obstak ki kanpe kont mesaj levanjil la. Chak fwa lòm lan tande mesaj levanjil la, pil vye kwayans sa yo kòmanse ajite oubyen manifeste yon fason pou yo reziste mesaj la.

Nan domèn peche, gen de reyalite ki envès, men ki mache men nan men.

1) Reziste peche egal a reziste Satan ki vin egal a obeyi Bondye. Ou reziste peche atravè soumisyon-w’ a volonte Bondye. Rezistans ou baze sou obeyisans anvè Bondye.

Viktwa sou peche demere anndan volonte Bondye. Kidonk, ou gen viktwa sou peche atravè soumisyon a volonte Bondye ke-L’ revele atravè Pawòl Li.

2) Livre tèt ou nan peche egal a soumèt ou a Satan ki vin egal a dezobeyi Bondye. Ou lage kò-w’ nan peche atravè dezobeyisans ou a volonte Bondye. Obeyisans ou a Satan baze sou dezobeyisans ou anvè Bondye.

Yon vi defèt oubyen esklavaj demere anndan volonte Satan pou lavi-w’. Ou ap mennen yon vi defèt atravè soumisyon-w’ a enfliyans Satan ap egzèse nan lavi-w’.

You need a belief that transcends fleshly desires. You won’t get the satisfaction you’re looking for.

Trè, Trè, Trè Enpòtan Konsènan Enpak Pawòl La