Reyalite sistèm mond sa ki gen pou-l’ wè ak vi rebèl kont Bondye ke moun ap mennen se yon “fo reyalite” ke-l’ ye.

Pou ki rezon? Se yon reyalite ki baze sou desepsyon ke dyab la ap nouri panse lòm lan atravè sistèm mond sa-a.

Tout panse moun k’ap viv lwen Bondye sanse konekte a sistèm sa oubyen panse yo se jis yon refleksyon sistèm sa.

Se sa ki vin kreye sa yo rele yon mantalite kolektif ki opoze volonte Bondye.

Vrè reyalite-a baze sou vi ke Bondye vle pou lòm mennen selon Pawòl Li paske reyalite sa li etenèl. Men fo reyalite sistèm mond sa li tanporè.

Sa dyab la fè, li kwense oubyen kenbe lòm an kaptivite nan sistèm mond sa nan yon degre kote yo anbrase fo reyalite sa ki baze sou “manti” kòm yon bagay ki nòmal oubyen kòm “vrè reyalite” ke yo dwe kite gouvène lavi yo.

Epi, yo santi ke yo retwouve tèt yo nan sistèm sa. Fason yo panse vin limite pa dimansyon fo reyalite y’ap opere landan-l’ lan.

Fo reyalite sa se li menm ki fè plis sans a lom chanèl la paske li ofri egzakteman sa ke nati peche yo dezire.

Moun ki anbrase fo reyalite sa kom vrè reyalite ki dwe gouvène lavi yo vin gen yon sèl opsyon konsènan fason ke yo dwe mennen vi yo ke yo kwè ki ka bay satisfaksyon ke yo gen yon swafte anvè-l: opsyon sa se jis viv selon jan sistèm mond la ap dikte yo pou yo mennen lavi yo.

Atrave fo reyalite sa, enmi-an konvenk ke yo bon jan yo ye-a. Jis mennen lavi yo selon dezi ki nan yo. Depi ke yo konvenk ke yon bagay oke, jis fe-l’.

Vi-w’ se pou ou, ou dwe lib pou mennen lavi-w’ jan-w’ vle san moun pa bezwen ap vin di-w’ fason pou ou viv paske sa-w’ fe ak lavi-w’ pa biznis peson.

Toutotan ke sa ou ap fe pa fe okenn lot moun mal, jis fe sa-w’ vle.

Ou jen toujou, ou gen kont tan-w’ pou fe levanjil. Ou selman ka jen yon sel fwa, tou sezi opotinite sa pou jwi jenes ou otan ke-w’ kapab. Rejwi otan plezi ke-w’ kapab.

Vre fason pou ou viv lavi-w’ byen se le-w’ gen ase libete pou ou fe yon seri eksperyans nan mond sa pou ou fe tet ou plezi.

Tout vye tandans sa yo baze sou nati peche k’ nan lom ki vin pwodwi reyalite sistem mond sa.

Se menm reyalite sistem mond sa ki vin tounen yon sous enfliyans, motivasyon, ak enspirasyon konsenan sa lom lan vle fe.

Dyab la kreye yon platfom pou lom lan kapab eksprime dezi sa yo.

Rezistans Kont Laverite

Genyen yon reyalite konsènan lavi-w’ ke-w’ vle kreye ki gen kòm baz nati peche sa-a k’ap pwovoke tout kalite rebelyon anba enfliyans Satan.

Se yon reyalite kote ou pral fè yon seri desizyon pou ap mennen vi-w’ deyò volonte Bondye akoz ou gen tan konnen davans si-w’ soumèt tout vi-w’ a Bondye totalman, otomatikman ou p’ap ka fè sa ke-w’ gen entansyon fè.

Soumisyon-an pral mande fò-w’ debarase tèt ou de tout sa Bondye pa renmen pou-w’ kreye espas nan lavi-w’ pou prezans ak pwisans Li ka domine lavi-w’.

Si se pa dezi-w’ pou fè sa, fòk ou chache kreye yon fason pou elwanye tèt ou de responsabilite ke-w’ genyen anvè Kreyatè-w’ jis pou-w’ ka fè sa-w’ vle. Kidonk, tout sa ke ou vle fè vin tonbe nan reyalite sa-a ki gentan planifye atravè panse-w’.

Reyalite ki gentan enkane nan panse-w’ la vin tounnen yon bagay ke-w’ paka chanje ide-w’ sou li tèlman gen yon atachman mantal ak spirityèl ak vi rebèl sa-a ke-w’ vle mennen-an. Se konviksyon-w’ pou fè sa-w’ ke-w’ gen ide fè. Entansyon-w’ se pou ou rejwi otan plèzi ke-w’ kapab.

Ou mete tèt ou nan yon sitiyasyon kote ou oblije ap pouswiv sa ke ou gen nan entansyon pou-w’ fè.

Ou konprann sitiyasyon-an nan sans fòk ou bay tèt ou kont libète, fleksibilite, ak tan pou ou kapab akonpli tout sa-k’ vin nan panse-w’ ki gen rapò ak vi sa ke-w’ vle mennen-an.

Reyalite Lom Lan Antotye

Lom lan kite verite Pawol la ki absoli pou-l’ al antotye tet li ak reyalite materyel, reyalite ke-l’ ka we, santi, ak tande, oubyen reyalite ki konekte a 5 sans li yo.

Yon reyalite ki si frajil, ki chanje a nenpot moman. Yon reyalite ke Satan kapab manipile-l’ fasilman.

Verite-a di lom lan kanpe lwen oubyen kouri pou imoralite seksyel, men reyalite mond lan di lom lan li enposib.

Tout moun ap fe-l’, presyon-an twop, verite-w’ kwe-a pa gen plas li nan tan moden sa. Kwayans sa pase mod.

Kidonk, reyalite sistem mond sa fe-w’ konprann ke pa gen yon fason ou ka penetre atmosfe desepsyon sa ke anpil ap benyen ladan-l’ ak verite Pawol la.

Ou ap tonbe kanmenm, ou ap lage bay, ou p’ap ka kanpe sou verite-a ki sipoze gid lavi-w’.

Kidonk, sa reyalite vi ke moun ap mennen, sa presyon lavi ap di-w’, sa mantalite kolektif sistem mond lan di-w’, sa dezi lache yo di se li pou-w’ fe.

Reyalite Kont Verite

Gen plizye dimansyon reyalite k’ap evolye alantou vi lom lan. Gen yon dimansyon reyalite ki gen pou-l’ we ak fason mond materyel la stritire. Se yon reyalite ke lom lan kapab fe obsevasyon ak eskperimantasyon ave-l’.

Se yon reyalite ki gouvene pa prensip oubyen lwa natirel.

Gen yon dimansyon reyalite ki gen pou-l’ we ak responsabilite lom lan anve pwop tet li, fanmi-l’, ak moun alantou-l’. Anndan menm reyalite sa, ou jwenn egzijans ak presyon lavi.

Gen yon lot dimansyon reyalite ki gen pou-l’ we ak sistem mond sa ki baze sou vi rebelyon ak imoralite ke moun ki pa konn Bondye yo ap mennen. Se yon reyalite ki baze sou desepsyon Satan.

Tout reyalite sa gen yon gwo enpak ke yo fe sou fasone fason lom lan panse. Kidonk, lom lan abode reyalite sa yo nan yon pespektif lojik oubyen rasyonel.

Sa vin rann ke sa reyalite-a di yo, se nan li y’ap kwe. Yo vin pa ka gade reyalite-a nan yon pespektif ki depase pespektif k’ap domine panse yo.

Men vre reyalite-a se verite Pawol la. Se yon reyalite ki absoli, inebranlab, ki p’ap chanje.

Se dimansyon reyalite sa ki demere nan espri Kwayan atrave prezans Sent Espri Bondye. Anplis, Bondye te kreye lom lan pou-l’ te viv an fonksyon reyalite sa.

Akoz lom lan pedi relasyon-l’ ak Bondye, lan lom lan vin antotye ak yon reyalite ki frajil, ki kapab chanje a nenpot moman, ki kapab enfliyanse fasilman pa Satan. Lom lan vin plis konsene de lot vesyon reyalite ki antoure-l’.

Reyalite ki alantou-l’ yo pi evidan pou li tou. Yo pi pre lavi-l’ ke verite-a selon jan lom lan santi-l’.

Vi-l’ vin yon pwodwi vesyon reyalite sa yo k’ap gouvene lavi-l’. Kidonk, Pawol Bondye-a ki se vre reyalite vin pa gen plas Li nan vi lom lan.

Menm le reyalite-a vre, li paret tre evidan, men sa pa vle di li an konfomite ak verite Pawol la ki se reyalite absoli.

Nanm lan al chache akonpli pwop anbisyon-l’ atrave satisfaksyon fizik ki gen pou we a ko fizik lom lan olye pou-l’ fe sa selon dezi espri-a ki la vre satisfaksyon lom lan demere. Dezi espri lom lan se glorifye Kreyate-l’ atrave yon vi obeyisans.

Lafwa

Pou lom lan fe Bondye konfyans, fo-l’ fe panse ak kwayans soti de reyalite sistem mond sa pou-l’ anbrase Pawol Bondye-a.