Enfliyans Satan nan lavi sila yo k’ap reziste levanjil an Jezi Kris manifeste atravè yon lanmou, koneksyon, depandans, pasyon, oubyen atachman pwofon ke yo gen ak vi dezobeyisans y’ap mennen-an. Sa vin kreye yon mantalite ki anglobe tout sa y’ap fè atravè vi sa.

Tout sa y’ap fè vin yon manifestasyon vye mantalite sa. Yo vin devlope yon sansibilite anvè vi peche y’ap pratike nan yon degre si yo fè yon desizyon repanti, y’ap pèdi yon gran pati ki vital nan lavi yo. Gen yon bagay ke y’ap regrèt jou yo ta jwenn tèt yo nan yon sitiyasyon kote yo pa ka aji sou sa yo te konn fè.

Se sansibilite anvè vi peche sa ki fè yo pèsevwa levanjil kom yon menas pou libète yo.

Gen yon depandans mantal ke sa vin kreye nan lavi yo ki konvenk yo ke yo bezwen vi peche sa pou yo ka fonksyone byen. Menm ko-a vin devlope yon depandans sou plezi lache kom yon bagay li bezwen pou-l’ soutni tet li.

Sa vin rann ke yo pa ka gade pi lwen ke dimansyon tenèb y’ap viv la pou yo anbrase yon lòt vi atravè mete yon fen nan vi peche sa y’ap mennen-an.

Dyab la maske ko-l’ deye sa yo renmen, deye plezi lache, deye banboch pou-l’ enfliyanse yo.

Satan pa enfliyanse lòm endepandan de yon kapasite oubyen abilite ki pa-t’ deja la nan lòm lan.

Sa vle di se atravè menm kapasite sa yo ke Bondye te mete nan lòm pou pwòp glwa-L’ pou ki te pèmèt lòm lan opere kòm yon kreyati ki fèt nan imaj Li ke Satan pase pou-l’ egzèse enfliyans sou yo. 

Tout sa ke lòm lan ye nan kondisyon orijinèl ke Bondye te kreye sòti nan Bondye. Espri-l’, nanm li, ak kò fizik ki sòti nan pousyè tè ki se yon eleman ke Bondye te gen tan kreye dejan avan-L’ te fè lòm lan. Yo tout jwenn orijin yo nan Bondye.

Tout kapasite lòm lan genyen: entèlèk, emosyon, volonte ki defini sa-l’ ye kòm yon pèsòn sòti nan Bondye. Anplis, kapasite pou-l’ aji oubyen fonksyone sòti nan Bondye.

Bondye plase dezi nan lòm ki se yon abilite pou lòm lan vle oubyen renmen yon seri bagay. 

Tout sa ke lòm lan ap akonpli nan vi sa baze sou yon dezi. Chwazi fè volonte Bondye, objektif lòm, vizyon ke lòm lan genyen konsènan sa-l’ ta vle akonpli, yo tout nèt gen kòm baz yo yon dezi.

Ebyen se atravè menm dezi sa yo ki vin souye pa peche ke Satan enfiltre pou-l’ fè lòm lan fè tenten. Lè n’ap gade eta lemond jodi-a, koz santral eta lemond baze sou movèz dezi k’ap manifeste nan lòm anba enfliyans Satan.

Imoralite, abominasyon, pil krim, rayisman, jalouzi, anvi, movèz anbisyon, ògèy, awogans, elatriye tout se yon eskpresyon movèz dezi k’ap pote lòm lan ale.

Kidonk, memm Satan ak tout akolit li yo tou pa gen anyen y’ap fè nan mond sa ki pa depann sou yon abilite ke Bondye te mete nan yo nan moman L’ te kreye yo nan kondisyon orijinèl ke yo te ye.

Paske egzistans yo, entèlijans, emosyon, volonte, ak kapasite pou yo aji, eleman ki konstitiye kò selès ke yo genyen sòti nan Bondye. Se menm kapasite sa yo ke yo menm nan eta koripsyon yo ye-a y’ap itilize pwòp fason pa yo.

Egzistans Satan ak akolit li yo depann sou Bondye. Satan gen yon bagay ke-l’ branche sou li ki sòti nan Kreyatè-a ki kenbe-l’ an egzistans. Si Bondye ta rale plòg la sou misye ak tout parèy li yo, yo tout t’ap desentegre.

Sa demontre kòman Bondye ap domine sou tout bagay. Sa demontre ke Satan ak tout parèy li yo se woulibè ke yo.

Satan se yon piyaje, woulibe, ak eksplwate k’ap pran avantaj sou sa ke Bondye fe.

Priye

A chak fwa m’ panse ak Satan k’ap fe ravaj nan lavi lom atrave eksplwate kapasite ke-W’ te mete nan yo pou pwop glwa-W’, sa montre enferyorite Satan konpare ak siperyorite absoli-W’.

Sa montre-m’ ke Satan pa ka fe anyen ditou san-l’ pa depann oubyen itilize yon bagay, yon reyalite, yon domen, yon kapasite ki pa-t’ kreye pa Ou menm.

Tout sa misye ap fe santre sou yon sel reyalite fondasyonel ki se pran avantaj sou sa ke-W’ te kreye, vire-l’ fason pa-l’ pou-l’ fe dega.

Sa demontre-m’ tou depandans total misye sou sa-W’ fe konpare ak endepandans total Ou sou anyen.